@ 
繼深水埗及元朗區區議員喺七月中赴上海後，60位東區同西貢區區議員日前(26-29/7)亦喺兩位民政專員帶領下，赴浙江省 參加為期四日三夜嘅第七屆區議會議員培訓班 。
四天嘅學習同考察行程 緊密，除咗有關社區治理嘅專題課堂 ，更喺幾個具代表性嘅社區設施中實地講課。呢個多元化嘅課程畀區議員深入了解內地喺地區治理，以及動員居民參與社區服務嘅經驗，啟發咗大家點樣喺日常社區工作中力求創新同突破 。
喺眾多嘅課堂和參觀考察活動中，不得不提嘅就係以下兩個活動 ︰
有效應用「楓橋經驗」喺香港地區治理
區議員參觀 咗座落喺浙江省杭州諸暨市楓橋鎮嘅楓橋經驗陳列館 ，陳列館充分展示「楓橋經驗」近60年來一脈相承嘅發展歷程，以及與時俱進嘅時代價值。透過專題理論教學 ，區議員獲啓發思考 點樣可以運用新時代「楓橋經驗」進一步夯實香港由治及興嘅社會基礎、區議員應該點樣結合自身嘅工作，喺面對新情況、新問題、新特點下，發動身邊群眾 參與地區治理，從歷史傳承、全球 視野同埋時代角度，探索點樣可以持續推動地區治理體系同埋治理能力 。
居民積極參與社區事務 共同建設美好生活環境
此外，代表團亦參觀咗位於杭州上城區上羊市街社區嘅中國社區建設展示中心 。喺1949年10月23日，新中國第一個居民委員會就喺呢度成立，當中一磚一瓦背後都有深厚歷史記憶。通過社區文化活動講解、社區服務介紹等，區議員深入了解內地社區喺社區服務及環境治理嘅顯著成效 。
參觀過後，專員和區議員跟上羊市街社區居民委員會嘅代表交流 地區治理和居民參與社區建設嘅經驗。除咗居民委員會嘅功能、主要服務對象、任期同產生辦法 ，大家亦深入討論點樣照顧社區中唔同年齡 、唔同背景居民嘅需要 ，以及點樣利用資訊科技 加強居民委員會與居民之間嘅聯繫 。大家喺呢個交流環節都獲益良多，尤其區議員作為社區工作者，要有持續創新嘅能力 同為民服務嘅精神，更要鼓勵居民積極參與社區服務，一齊建設美好生活環境。大家喺實地考察和面對面交流後，喺呢幾方面都有好大嘅啟發 。
區議員感謝國務院港澳辦、浙江省人民政府同浙江行政學院嘅悉心安排，今次嘅培訓令佢哋獲益良多。區議員會學以致用 ，將學到嘅理論同交流期間分享嘅經驗充分運用喺地區工作上 ，為市民帶嚟更美好嘅社區同生活 。
