@ 
大廈管理 做得好 ，業主同住戶就可以享受舒適嘅居住環境。為咗為持分者提供更多資訊，屯門民政處22/8聯同屯門區議會社會福利及房屋委員會轄下工作小組，為業主立案法團、業主委員會同管理公司嘅代表舉辦咗大廈管理座談會。
座談會除咗有通訊事務管理局簡介「提升樓宇內置電訊系統及光纖接達樓宇標籤計劃」外，仲有專家分享大廈維修方面嘅知識 ，包括由市建局介紹「預防性維修資助計劃」 同香港測量師學會探討處理大廈維修常見問題 。另外亦有由律師分析法團及管委會會議相關案例 ，幫大家加深了解大廈管理 。參加者對唔同嘅講題都好有興趣，喺問答環節都有積極討論互動。
屯門嘅區議員都好積極參與支持 ，大家一齊學習更多有關大廈管理嘅知識，喺日後協助居民處理大廈管理問題嘅時候，就可以更得心應手。
要做好大廈管理，除咗需要法團同管理公司積極處理，亦都需要每位業主同居民嘅配合。如果大家想對大廈管理知多啲，可以上民政事務總署嘅大廈管理網頁瀏覽相關資訊（https://www.buildingmgt.gov.hk/tc/ ），或者留意參加民政處下次再舉辦嘅大廈管理活動。
@ 