@ 
為咗推廣非遺食品製作技藝及傳承中華文化，屯門區青年參加咗由屯門民政處及屯門區青年發展及公民教育委員會舉辦嘅兩個工作坊，分別跟隨大師傅學習製作港式奶茶 同埋華服鈕花嘅技藝 。
大師傅細心向學員講解港式奶茶喺香港茶餐廳嘅演變、沖泡工具及技巧。一班青年人喺茶香撲鼻嘅製作過程中學習呢項香港非遺飲食文化手藝，同學都費盡心思去學習同嘗試。其實製作過程無想像中咁容易 ，同學對順利沖泡到一杯醇滑飄香嘅港式奶茶滿有成功感。
「成功有約」嘅學員仲同屯門區青年發展及公民教育委員會委員去咗學習製作華服鈕花，年輕一代而家都好少用針線，對鈕花 呢門用針線嘅精細傳統技藝充滿新鮮感，努力學習掌握呢門技藝，因為嚟緊佢哋會將所學應用到「夜屯園」活動，回饋社區，協助即場登記參加鈕花工作坊嘅市民，製作一件自己專屬嘅鈕花頭飾或者匙扣。
大家記住mark低10月10至12日一連三晚每晚6點至10點半喺 屯門文娛廣場舉行嘅「18區日夜都繽紛@夜屯園」啦，有音樂、有美食夜市、有懷舊香港情懷，仲可以報名參加鈕花同無人機足球工作坊、港式奶茶工作坊，名額有限，先到先得！
