@ 
尋日（4/2），超過750位大埔區中小學生 齊集東昌街體育館，參加由大埔區撲滅罪行委員會同大埔民政處合辦嘅「FUN享正向生活」活動，度過充滿正能量 嘅下午。
活動已經係第5年舉行，今年邀請到土生土長大埔人、羽毛球 港隊代表兼大埔青網青年大使鄧俊文擔任嘉賓，與同學分享佢喺運動員生涯上點樣憑藉正向心態跨越難關 、越戰越勇 ，勉勵同學要保持信念，堅持做自己熱愛嘅事，訂立短期同長期目標，過程中即使遇到困難，都要不放棄、不服輸，慢慢累積經驗，就能夠達成目標！除咗同現場參加者對話交流 外，俊文仲同嘉賓、同學仔一齊切磋球技 ，打成一片，全場氣氛非常熱烈 ！
當日同時亦係滅罪會另一個同大埔區小學校長會合辦嘅活動「健康生活你我他 遠離毒品誇啦啦 」頒獎禮 。恭喜晒各位禁毒標語設計 、安全社區親子填色 同埋攤位設計 比賽嘅得獎同學 。現場仲有得玩由小學生設計嘅滅罪禁毒主題遊戲攤位 ，「FUN」享防罪信息！
大埔區滅罪會希望透過今日嘅活動，培養青少年積極正向 嘅生活態度，實踐健康嘅生活方式，識得遠離 毒品 ，拒絕 罪惡誘惑。
出席活動嘅嘉賓包括大埔民政專員鍾慧婷、大埔警區副指揮官黎晧暉、大埔區滅罪會主席陳佩添與一眾委員等，同時感謝大埔海陽羽毛球會鄧端陽教練同梁佳福教練擔任嘉賓主持。
