@ 
葵青區葵涌邨夏葵樓尋晚(15/2)9時多發生停電事故，約760個單位受影響 ，大廈食水供應亦一度受影響，猶幸期間升降機維持服務。
葵青民政專員梁乘龍、葵青區議員，以及葵涌邨南關愛隊隨即趕赴現場，與房屋署等部門協作，為居民提供緊急支援服務，包括喺供電正常嘅地下大堂設立物資站提供食物食水同充電器、上樓探望有需要嘅長者等，以及即時解答居民嘅查問，務求達到「急居民所急」。
房屋署安排搶修下，大廈喺今日(16/2)凌晨約1時半恢復供電同供水.，讓市民生活能夠喺今天農曆大除夕回復正常。房屋署人員更繼續通宵修復引發停電嘅起因，有關工程已經喺今日中午順利完成。
葵涌邨南關愛隊喺今早再度上門探訪關懷獨居長者及有需要住戶，通知佢哋維修嘅最新情況。
葵青民政處感激各個單位喺呢次停電事件中嘅快速反應及有效支援，將對居民嘅影響盡量減至最低。今日事故應對亦體現咗社區力量喺應對緊急事故中嘅靭性，發揮鄰里互助互愛嘅精神。
