@ 
為推動深水埗區咖啡文化及振興地區經濟，深水埗民政處、深水埗區議會提振地區經濟專責工作小組、深青社及新鴻基地產慈善基金合辦「深·啡 」咖啡節，喺今個周末一連兩日(14/3-15/3)中午12時至晚上8時，於長沙灣海濱長廊舉行。
「深·啡 」嘅主題係「帶住寵物來飲啡」。匯聚25個生活品牌，包括多家精品咖啡店、本地手工雪糕、潮流美食、傳統餅家輕食、寵物用品等。除咗咖啡市集外，現場仲有咖啡拉花工作坊，同埋咖啡畫工作坊，無論大人小朋友都可以發揮創意，感受咖啡文化嘅不同面向。
場內特別為各位主子設立寵物區及寵物歷奇，等主人可以一邊歎咖啡，主子亦玩得盡興。碼頭位置仲有busking同地區團體表演，大家可以坐喺大會準備嘅露營餐椅，喺維港兩岸美景當前觀賞表演。
前日開幕典禮有幸邀請到多位重量級嘉賓蒞臨主禮，包括民政總署副署長易志宏、深水埗民政專員王浩宇、中聯辦九龍工作部處長歐陽瑋、立法會議員梁文廣、黃永威、深水埗區議會提振地區經濟專責工作小組主席黃俊雄、香港城市大學副校長陳志豪、深水埗街坊福利事務促進會理事長梁鉅海，以及深水埗居民聯會理事長陳偉明。
活動集合官、商、民嘅力量，畀大家感受與一般地區活動不同嘅氛圍，享受咖啡芳香、寵物暢玩、維港日落美景嘅周末。「深·啡 」尋日單日已錄得約10,000入場人次，人流絡繹不絕，唔少大熱產品喺黃昏之前經已陸續售罄，要再補貨。各位咖啡愛好者及街坊萬勿錯過，把握今日最後機會嚟長沙灣海濱長廊，同家人、朋友及毛孩嚟「chill一chill」！
深水埗民政處會繼續與深水埗區議會及各地區團體保持緊密合作，提振地區經濟，推動社區參與，攜手共建一個關愛和諧、人寵共融嘅社區。
