@ 
為加深對國家發展同產業轉型嘅了解，深水埗嘅地區團體近日分別舉辦湖南郴州同廣東潮州嘅國情考察團，透過實地考察，深入了解產業運作模式同政策方向，加強對國家經濟發展脈絡嘅認識。
1. 郴州
深水埗工商業聯絡委員會喺主席黃權威帶領下，於17-19/4前往郴州考察。行程聚焦產業轉型同經濟效益，先後考察「永興銀樓」同「中國銀都文創園」，了解當地如何透過回收再造推動循環經濟，發揮資源最大價值。考察團亦到訪「711功勳鈾礦」，參加《不朽的功勳》思政課，認識國家工業發展歷程，體會老一輩為國家無私付出、艱苦奮鬥嘅精神。
2. 潮州
深水埔街坊福利事務促進會喺理事長梁鉅海帶領下，於19-21/4前往潮州考察，中聯辦九龍工作部處長張翰、深水埗居民聯會理事長陳偉明，以及多位地區領袖亦一同參與。團員從文化經濟角度了解城市發展，走訪潮州古城、湘子橋同特色茶館，並與相關單位交流，探討如何善用文化資源，帶動夜間經濟同活化地方產業。
地區治理經驗分享及討論
深水埗民政專員王浩宇亦有參與兩個考察團嘅部分行程，帶領團員與兩地市委統戰部及相關部門會面，就地區治理、社區建設、文化交流等議題作深入討論。雙方亦就政商協作、社區服務等範疇交流經驗 ，互相借鑒不同地區嘅成功做法。
團員均表示，今次行程有助佢哋更深入了解國家產業發展、經濟模式同地區治理經驗，未來亦會將相關經驗帶到深水埗，推動地區經濟發展同提升治理水平。
