@ 
為咗讓「國安．家好」理念持續「深」入校園、融入社區，深水埗民政處尋日（23/4）聯同深水埗區撲滅罪行委員會，舉辦《同「深」衛國安》國家安全教育日2026。活動以「軍事安全」為主題，來自區內8間中小學、超過200名師生，同一眾滅罪會委員一齊參觀昂船洲軍營解放軍駐香港部隊展覽中心，加深對祖國軍事歷史及發展嘅認識，同時了解駐港部隊嘅工作，感受守護家園背後嘅堅實力量。
展覽中心以「夢起東方」為主題，設有「中國夢」、「強軍夢」及「香江衛士」三大主題展廳，仲有裝備模型展示區。同學仔參觀「強軍夢」展廳時，了解到國家點樣以強大軍力作為後盾，保障人民安全同社會穩定；而喺參觀「香江衛士」展廳時，就更清楚認識駐港部隊點樣依法履行防務職責，守護香港繁榮穩定。滅罪會委員仲化身「國安導師」，以生動易明嘅方式講解「總體國家安全觀」，啓發同學由日常生活細節開始，了解維護國安其實同自己息息相關。
當日亦有多位嘉賓到場支持，包括深水埗民政專員王浩宇、深水埗區滅罪會主席盧永文、深水埗居民聯會首席會長梁鉅海，以及香港中旅集團港澳工作部副總經理程春華。專員亦鼓勵大家將今次所見所學，分享畀屋企人同朋友，將國安信息帶到校園同社區。
深水埗民政處將持續透過跨界合作，推動國安教育，與社區攜手同行，培育新一代嘅家國情懷，讓維護國家安全嘅種子喺社區扎根，一齊築起守護國家嘅穩固防線！
