@ 
為咗更深入關懷區內基層家庭嘅居住情況同實際需要，九龍城民政專員蔣志豪帶領民政處團隊喺30/4早上前往聖雅各福群會營運嘅過渡性房屋「雅園」進行參觀同探訪。
探訪期間，聖雅各福群會代表向民政處團隊詳細講解「雅園」嘅資料、配套設施、日常營運情況及為居民提供嘅服務。「雅園」位於紅磡鶴園街，前身為路政署嘅工地及訓練中心，後來政府將該用地重新規劃，改建成過渡性房屋，合共提供31個單位。團隊隨後參觀咗「雅園」嘅設施，深入了解過渡性房屋如何有效為有需要人士提供適切嘅居住空間。
團隊亦上門進行家訪，同「雅園」住戶面對面交流，送上關愛同問候，細心聆聽佢哋搬入「雅園」後嘅生活點滴同轉變。
九龍城民政處會繼續同各社福機構保持緊密合作，用心聆聽街坊聲音，關顧區內有需要人士，攜手共建一個充滿愛同人情味嘅九龍城！
