@ 
上星期四（7/5）晚上約8時半，青衣鄉事會路一段水管爆裂，導致附近多個屋苑同鄉村一度暫停食水供應。事關民生福祉，葵青區由區議會、地區三會同關愛隊組成嘅「三駕馬車」全力應對跟進事故。
經葵青民政專員梁乘龍實地協調，水務署安排臨時供水（包括3架水車同超過40個水缸）到受影響屋苑同鄉村。立法會議員同多名葵青區議員亦趕赴現場，跟進事態發展，並向居民發放即時資訊。地區三會成員同三隊當區關愛隊（包括偉盈、青衣邨同翠怡關愛隊），以及各村村長等亦分別到各受影響屋苑同鄉村協助居民取水。水務署亦與警方協力，於午夜前重開青衣鄉事會路北行快線。
另外，葵青民政處與各個受影響屋苑嘅法團同管理公司保持緊密聯絡，以便通報最新資訊及了解居民需要。水務署亦透過社交媒體向公眾發放資訊。經水務署供水調度及緊急維修，大部分受影響嘅屋苑同鄕村於凌晨約2時前陸續恢復食水供應。最後一個受影響屋苑嘅食水供應亦於翌日（8/5）上午11時半陸續恢復正常。
因應今次事故，葵青區議會喺尋日（12/5）舉行嘅會議上作跟進，區議員就葵青區地下食水管道老化問題表達關注並建議具體解決方案，亦探討如何喺發生類似事故時加強對居民嘅支援。水務署喺回應區議員時表示，青衣鄉事會路嘅老舊水管早前已被納入水管更換工程計劃。因應今次事故，水務署會馬上分階段展開有關路段嘅水管更換工程，同時與有關部門密切商討工程期間嘅臨時交通安排，並且同民政處及區議員就工程進度緊密聯繫，務求盡量減低工程對附近居民嘅影響。
今屆葵青區議會亦會以「更新老化設施」為其中一項地區關注議題，議員會繼續密切留意區內更換老化喉管嘅進度同安排。
葵青民政處一直透過地區管理委員會，與相關政府部門跟進區內老化喉管嘅更換工作，並就相關工程同緊急應變協調部門之間嘅溝通。葵青民政處會持續跟進，聯同地區治理「三駕馬車」，為區內居民建設更宜居嘅社區。
