@ 
元朗區青年網絡計劃一直重視區內青年嘅全人發展。為增強青少年嘅環境保育意識，我哋今年繼續同世界自然基金會香港分會 合作，喺米埔自然保護區一連兩個星期五至六（20-21/3及27-28/3）舉辦兩場2日1夜嘅「元朗區青年Fans Club自然保育生態教育營」 。
米埔自然保護區一向以濕地保育同埋生物物種多樣性見稱 ，今次教育營更加可以讓參加者體驗「米埔的日與夜」 。參加者首先透過夜探活動揭開米埔嘅「神秘面紗」 ，近距離接觸夜行動物蝙蝠 、可愛嘅貓頭鷹 ，更難得嘅係喺城市都可以見到螢火蟲 ！佢哋又喺漆黑一片嘅夜幕下，學識運用視覺 以外嘅感官如聽覺 、嗅覺 去感受大自然嘅聲音同氣味。翌日日間，參加者則前往觀賞不同類型嘅稀有鳥類 ，同埋探索濕地多變嘅地貌如淡水沼澤及基圍 ，親身感受日與夜間截然不同嘅米埔 。
元朗民政專員Kelvin與世界自然基金會香港分會總監Nicole一齊同教育營嘅參加者互動，分享參觀米埔自然保護區嘅感受同埋服務體驗。專員更鼓勵參加者繼續身體力行參加「元朗區青年網絡」舉辦嘅義工及導賞員計劃，支持米埔嘅環境保育工作 同埋投入社區服務。
一班青年都表示，能參加今次教育營嘅機會十分難得，尤其夜遊米埔濕地同埋見到螢火蟲嘅經歷令佢哋非常深刻、難忘 。佢哋都讚歎喺香港呢個現代化嘅國際大都會 ，仍能保育珍貴嘅濕地以及一眾以濕地作為棲息地嘅生物，希望日後可以為香港嘅自然保育同埋生態環境出一分力 。
